12.10.2008

espor[a] nel aire!!



Espor d'Asturies, sigue acercando el xuegu a la sociedá, depués de collaborar nel II Cursu de Monitores de Xuegu y Espor Tradicional, esta selmana espor[a] foi convidada a Acuto, el espaciu de Carlos Suari na RPA onde falar de la cultura física tradicional.

Na entrevista, podéis sentir les razones que nos movienon pa crear espor[a], los oxetivos tanto esportivos, como d'investigación y d'estudiu del xuegu tradicional que nos marcamos pa esti añu, y les actividaes nes que tuviemos participando n'estos pocos díes de vida.

Pa sentir la entrevista, servímonos d'otra emisora amiga como ye Radio Varal, que recueye bona parte de la información sonora sobre la billarda (liriu pa nós), y que vos aconseyamos tener como referencia radiofónica, pa nun vos perder nengún acontecimientu de la LNB nin del cada día más cercanu Campeonatu Nacional de Liriu.

Andái sollertes, les espores del xuegu tradicional tán nel aire!!!!!

12.04.2008

Liriu y bolos colos futuros monitores de xuegos tradicionales




Esta selmana espor[a] foi convidada pola Tertulia Cultural "El Garrapiellu" al II Cursu Básicu de Monitor de Xuegu y Espor Tradicional, pa facer una breve introducción a los Bolos de Tinéu y al Liriu, dos xuegos que formen parte principal de l'actividá d'Espor d'Asturies.

No tocante al Bolu de Tinéu, amás de repasar un poco d'historia, regles y curiosidaes d'esti xuegu, propusímos-yos a los futuros monitores posibilidaes d'adaptación y formes d'acercar esta y otres modalidaes de pasabolu teniendo en cuenta les característiques de los grupos colos que temos trabayando, y los materiales y l'espaciu col que contamos. Amás tuviemos la oportunidá xugar dalguna partiduca, pa que nun se "queixara" naide.

Pal xuegu del Liriu fuimos combinando diferentes modalidaes, xuegos por equipos, toos contra toos, etc. Pa intentar treslladar una visión lo más amplia posible de la bayura formes de xugar que se dan na xeografía del país, asina como los diversos nomes que recibe, liriu, paliyu, palichu, billarda, etc. Amás d'estes formes tradicionales, tamién quisimos amosar la forma competitiva de xugar que dende va tiempo vienen empleando los nuesos vecinos de la LNB, la cual compartimos nos campeonatos internacionales como la Copa Cantabrica de Liriu-Billarda.

Pa espor[a] foi un placer compartir una tarde d'actividá física tradicional colos futuros Monitores de Xuegos y Esportes Tradicionales, gracias a la bona iniciativa de "El Garrapiellu", qu'esperamos que dientro de poco de pasu al Cursu Avanzáu, nel que contamos poder participar.

12.01.2008

L'agua nun dió tregua y el Trofeo MaCallan de Liriu-Billarda tendrá qu'esperar al VII Alcuentru


Esta fin de selmana pasada como anunciaran los nuesos amigos de O Varal, espor[a] tuvo presente nel VI Encontro/Alcuentru de pandereta galega y asturiana, pero'l temporal nun permitió que se celebrara l'esperáu Trofeo MaCallan de Liriu·Billarda, quedando esti aplazáu pa la próxima convocatoria d'esti yá históricu intercambiu cultural, qu'entama tolos años l'asociación Trans-Eu, el VII Encontro/Alcuentru de pandereta galega y asturiana sera na próxima primavera en territoriu astur.

Dende espor[a] queremos agradecer el ciñu col que fuimos recibíos nel albergue de Sabucedo polos bravos pandereteiros galegos, que xunto colos nuestros representantes asturianos nun dexaron de tocar, baillar y cantar hasta l'alborecer, convirtiendo la del sabadu nuna nueche de xermandia ente estos dos pueblos hermanos.

11.29.2008

¿Por qué espor?


Nel númberu 93 del Lletres Asturianes (Academia de la Llingua Asturiana), apaecía l’artículu ‘Deporte’: una pallabra en xuiciu por necesidá, de Carlos Suari. Un trabayu nel que se muestra, d’una, que l’ usu actual de “espor” prevalez en determinaos contestos (la ropa, la moda), mentanto que n’otros foi desapaeciendo en cuenta del castellanismu “deporte”. Y ye qu’esti segundu términu surde dientro del sistema castellanu gracies a la recuperación d’un arcaismu (“deportar”) poseedor d’un significáu inconcretu: divertise, entretenese... pal perconcretu fenómenu modernu del “sport”. Na Asturies de principios de sieglu, momentu en que’l fenómenu esportivu entama a implantase socialmente, los mecanismos llingüísticos d’adaptación naturales fixenon qu’ensin mayor problema faláremos d’esportiva, esporman o espor, en xeneral. Col pasu los años, el sistema castellanu (con decisiones polítiques de fondu) acabó suprimiendo cualquier resonancia anglicista, y l’asturianu, entós y agora, subsidiariu del primeru aceptó esti castellanismu marxinal como propiu na so norma. Anguaño, la inmensa mayoría de les llingües europees usen l’adaptación particular del términu inglés “sport”, de la mesma manera que l’asturianu tien iguao pa sí palabres que como xofer, xalé, fútbol o restorán llegaron a estes tierres dende bien lluenxe. Nesta llinia los filólogos d’estremáu perfil consultaos por Suari pa ‘Deporte’: una pallabra en xuiciu por necesidá -Hector Xil, Xosé Nel Comba y David Guardado-, coinciden en buscar víes alternatives énte un casu de tan innecesaria y bultable dependencia sistémica del asturianu col castellanu.

>> Suari Rodrigue, C. (2006) 'Deporte'. Una pallabra en xuiciu por necesidá. Lletres Asturianes [93:2006], Páxines: 79-90. Academia de la Llingua Asturiana, Uviéu.

Y pela Cuesta la Vega
yá baxen los espormanes,
unos tiren pa Cualloto
y otros tiren pa Llimanes.
(Popular)

...eno tocante al espor
que se xuega n’El C
arnero.
(Pepín Quevedo)

11.28.2008

Directoriu web



espor[a] entama a trabayar nesti directoriu cola intención de atropar tola bayura páxines webs relacionaes colos xuegos ya esportes tradicionales que topemos na rede, p'asina faer más amañosu l'accesu a les referencies sobre etno-ludo-motricidá pa tolos navegantes esmolecíos pola actividá fisico tradicional.
Esperamos contar col vuestru sofitu pa dir enanchando esti proyectu, ya que nos apurráis les direcciones que puedan faltanos. Gracies.

Asturies

Bolos
Batiente
Bolu de Tinéu
Cuatriada
Pasabolu Vaqueiru
Muséu los bolos

Internacional

Asociación Europea de Xuegos ya Esportes Tradicionales
Alpiade - Native World Games

Canarias
Federación de Lucha Canaria

Cantabria
Federación Cantabra de Bolos

Castiella
Agrupación de clubes de Calva
Asociación cultural La Tanguilla
Museo del Juego de Fuentidueña

Catalunya
Centre de Promoció de la Cultura Popular i Tradicional Catalana
Coordinadora Intercomarcal de Bitlles/Birles
Institut Nacional d'Educació Física de Catalunya

Euskal Herria
Euskadiko Herri Kirol Federazioa

Galiza
Asociación Galega do Xogo Popular e Tradicional

Llión
Aluches

11.27.2008

Miles d'espores xerminen nel xuegu y l'espor d'Asturies


Hai un mes mientres xugabemos la II Copa Cantabrica de Liriu-Billarda, miles d'espores traidas dende terras galegas pola xente de la LNB capitaneados por Xermán Viluba, posaron nesti país, pa entamar a da-y forma a un proyectu que güei ye una realidá.

Un grupu xente esmolecíos pola situación actual del espor ya los xuegos n'Asturies, garramos esi testigu, y güei presentamos a la sociedá espor[a], que naz col enfotu de convertise en daqué más que un clú esportivu, naz pa da-y otra traza a la cultura físico del país, naz pa capitanear l'estudiu científicu de la etno-ludo-motricidá asturiana, y sobre too naz pa que los xuegos tomen la cai, p'acercar l'espor tradicional a cualquiera que como nós tenga ganes de trabayar y difrutar con esti patrimoniu cultural.