II Abiertu'l Barreñón

Espor d'Asturies organiza un nuevu alcuentru col liriu: el II Abiertu'l Barreñón.
L'añu pasáu, con motivu de la primer xoranda del Campionatu d'Asturies de Liriu, onde se pusieron les bases del Conceyu Nacional de Liriu, acompañóse la partida por equipos con el I Abiertu' Barreñón, que ganara'l nuestru compañeru Iyán.
Fináu con ésitu el II Campionatu d'Asturies de Liriu y pa seguir col so sofitu a esti xuegu y al CNL, volvemos a LLamorgal el sábadu 28 d'agostu, a les 12 del mediudía, pa entamar esti tornéu abiertu a la participación llibre y de baldre pa quien s'allugue a les pistes de LLanera.
Esperámosvos ellí.

A manaes en Guarda (Portugal)

Espor d'Asturies participó nel Alcuentru Internacional de Xuegos Tradicionales que tuvo llugar en Guarda (Portugal) entamáu pola Asssosiaçäo de Jogos Tradicionais da Guarda, los pasaos díes 9, 10 y 11 de xunetu. Nestos díes Espor[a] asistió a delles ponencies d'espertos internacionales en matería de xuegos y esportes tradicionales. Amás Espora participó por primer vez n'Asamblea de l'Asociación Europea de Xuegos Tradicionales, de la que forma parte dende primeros d'esti añu 2010, asina esti añu yeren tres les organizaciones que representaben a Asturies nesti Alcuentru, l'Asociación Bolu Vaqueiru, 6 Conceyos y Espor d'Asturies.

Amás de tar presente nes xornaes d'estudiu y participar activamente n'Asamblea de la AEXET, Espor[a] como yá ficiera l'añu pasáu n'Aranda de Duero participó nel Festival de Xuegos y llevó hasta Guarda un exemplu d'actividá lúdica tradicional. Pa esta ocasión a Espor d'Asturies prestába-y recuperar ún de los munchos xuegos nos que s'emplegaben pelotes de trapu. A manaes foi l'escoyíu que foi mui bien recibíu polos asistentes al Festival.

Asina Espor d'Asturies sigue reafirmándose nel so compromisu pa cola tradición xugada d'Asturies, y añu tres añu cuenta participar nesti tipu d'eventos qu'amás de pa compartir conocimientos, esperiencies y xuegos, valen p'asitiar a Asturies xunto a los paises cabezaleros na defensa de les actividaes lúdiques tradicionales.

Congresu "Los bolos. Tradición, cultura y patrimonio del pueblo asturiano."

Esti sábadu celebróse en Cangas del Narcea'l primer congresu que se fae n'Asturies sobre'l xuegu los bolos, parte perimportante del patrimoniu lúdico d'Asturies. L'Asociación del Bolu Vaqueiru xunto con Escuelactiva fonon los encargaos d'entamar esta primer xornada d'estudiu de los bolos asturianos, onde se xuntanon representantes de toles modalidaes federeaes y dellos representantes d'otres modalidaes, dalgunes d'elles en procesu de deportivización.

L'oxetivu del Congresu yera dar a conocer les distintes modalidaes de bolos que se xueguen n''Asturies, asina como reflexonar sobre la conservación, recuperación y promoción de les diferentes modalidaes y afitar la importancia de los xuegos tradicionales na identidá cultural y patrimonial asturiana.

El programa'l Congresu foi'l siguiente:

1. Presentación.

• D. Francisco Álvarez. Presidente de l'Asociación Bolo Vaqueiro.
• D. Desiderio Díaz. Presidente de la Federación Asturiana de Bolos.
• Dña. Belén Menéndez. Xerente del GDR Alto Narcea Muniellos.
• Dña. Bibiana Martínez. Ayuntamientu de Cangas del Narcea.

2. Ponencies.

• D. Fernando Maestro. Director del Museo de Juegos Tradicionales de Campo - Huesca. Socio fundador de la Asociación Europea de Juegos y Deportes Tradicionales y miembro de la junta directiva. "Juegos tradicionales, una forma de compartir un lenguaje común en la Europa actual".
• D. Carlos Suari. Investigador del Atles de los Bolos Asturianos (ABA). "Bolos asturianos: L.lier bien la tradición yía escribir el futuru".

3. Coloquiu.

"Situación actual, perspectivas y propuestas de futuro".

• Cuatriada. Octavio Rodríguez
• Bolu celta. Ceferino Fernández
• Batiente. Fernando Blanco
• Bolu palma. José Antonio Fernández
• Bolo rodao. Rafael García
• Bolu vaqueiru. Agustín Fernández

"El xuegu los bolos a través del tiempo: legado y futuro del pueblo asturiano".

• Museo de los bolos de Asturies. Isidro Caballero
• El Pasabolu de Cangas en Madrid. Andrés Menéndez
• Bolinos de Cuideiru. Ruperto Álvarez
• Bolos del Navia. Alejandro López
• Dexabolu. Tino Lozano
• Otras modalidades. Carlos Suari
  

Dende Espor[a] queremos felicitar a l'Asociación del Bolu Vaqueiru, por sacar alantre esta iniciativa pionera, y pernecesaria pa la dignificación de la nuesa tradición xugada.

¿Xugamos?

Doble triunfu en Noreña.

La segunda xornada del Campionatu d'Asturies de Liriu disputóse en Noreña esti domingu pasáu, con un éxitu total d'organización, que corrió a cuenta de la Camaretá de Liriu de Noreña. L'equipu de la Escuela de Gaites de Noreña tuvo la idega de llevar la partida a les cais de la villa condal, al pie del quioscu de música, y cuayó nuna espectacular xornada de liriu, tanto de xuegu como de públicu.

La partida acortióse a 15 carreres, p'aprovechar la demanda de xente que quería participar nel abiertu qu'escomenzaba dempués. Nun hebo hestoria: dempués de unes disputaes cinco primeres carreres, onde Asturlirio se punxo a la tiesta, Espor[a] volvió a sacar el so xuegu efeutivu y, con 35 puntos de carrera, algamó una nueva victoria pal club. Carlos y Iyán sofitaron el tirunfu con sendos plenos nos cocientes de puntuación, y Sergio, Mara y Luis Carlos, puntuaron tamién pal Campionatu d'Asturies de Liriu Individual. En segundu puestu quedó la franquicia decana Asturliriu (18), siguíu de la Camaretá (16) y de Sidrones (11), qu'alcanzó'l cuartu puestu, pesie a ser l'equipu caberu, pola incomparecencia de Quirinal (14), que solo contó con tres xugadores.

Ensin embargu, los Sidrones impondríense col so xugador Dani nel I Abiertu'l Picadillu de Noreña, tornéu onde los esporos malpenes superaron la primer ronda.

Esto fai qu'Espor d'Asturies sume yá 12 puntos de partida nel campionatu por equipos y que Carlos y Iyán seyan primeru y segundu nel individual, con 16 y 15 puntos respeutivamente.

Dende Espor[a] consideramos qu'esti eventu entamáu pola Camaretá supón un doble tirunfu: primero, pola victoria; y segundo, índa munchísimo más importante, porque'l nuestru enfotu de llevar los xuegos y l'espor tradicional asturianu a la cai, averándolos a la xente, vióse más qu'alcanzáu. ¡Gracies, Camaretá!

Espor[a] algama la primer victoria de la temporada na xornada d'El Llano

Esti domingu 28 de marzu celebróse na Escuela Pública "El Llano" de Xixón la primer xornada del II Campionatu Asturianu de Liriu, na qu'Espor d'Asturies algamó la primer victoria de la temporada con un resultáu de 63 puntos depués de les 30 carreres disputaes.

La xornada arrincaba a les 11 hores de la mañana del domingu, y depués de les 5 primeres carreres Espor[a] ya amosaba la so intención de ganar esta primer xornada faciendose con 11 puntos de los 15 xugaos. Depués de completaes 10 carreres, Quirinal Liriu Espor acurtiaba distancies poniendose con 18 puntos a tan solo 3 d'Espor d'Asturies. La igualdá mantúvose hasta les 20 carreres, onde parecia que Espor[a] y Quirinal diben disputase la primer y segunda plaza, pero nesi intre foi cuando la Camaretá de la Escuela de Música Tradicional de Noreña, apierto los sos dientes y nes 10 últimes carreres algamaba 22 puntos de 30 posibles, arrebatando al equipu avilesino la segunda plaza. Nestes carreres Espor[a] nun fizo más que confirmar la so victoria llegando a los 63 puntos, frente a los 46 de la Camaretá de Noreña y los 43 de Quirinal Liriu Espor.

Llueu de la tirada por equipos emprincipiaba el I Abiertu de "El Llano", na que la Camaretá con ganes de victoria nun dió tregua, y Lucía algamaba el trunfu depués de barrer en semifinales a Sergio (Espor[a]) y na final a Suari (Espor[a]) que llegaría a la final darréu de ganar a Mara (Espor[a]). Asina el podium del abiertu taría formáu por Lucía (Camaretá) y dos esporos, Suari y Sergio. Como ya ye vezu pal abiertu entamáu por Espor[a] contóse col sofitu de l'Academia de la Llingua Asturiana qu'apurrió dellos exemplares de les sos publicaciones pa entregalos a les/os ganadores.

Amás de da-y al liriu los asistentes degustaron dellos productos del país na espicha isotónica y disfrutaron otra vuelta más d'esti xuegu que esportificáu gracies al CNL, gana cada día más puxu y que va siguir allumando el camín de la dignificación de la cultura física asturiana.

Xixón acueye la primer xornada del II Campionatu Asturianu de Liriu

Depués de dellos meses de parón hibernal, y los conceyos previos pa la redaición del reglamentu pal II Campionatu Asturianu de Liriu, el CNL yá ta de vuelta. Lo mesmo que l'añu pasáu Espor d'Asturies, somos los encargaos d'entamar la primer xornada d'esta lliga que va pola so segunda edición y qu'esti añu agrupa a 5 equipos.

Asina esti domingu 28 de marzu dende les 11 na Escuela Pública "El Llano" de Xixón, Espor[a] ha defender el titulu frente a los ya vieyos conocíos d'Asturliriu y Quirinal Liriu Espor, y frente a les nueves incorporaciones de la Escuela de Música Tradicional de Noreña y Los Sidrones. Amás del preciáu troféu por equipos esti añu sumase un aliciente más, que ye el Campionatu Individual de Liriu, onde amás de los miembros de los equipos federaos podra xugar cualquiera que-y preste'l liriu y quiera pasar un bon ratu con esti xuegu tradicional.

El programa diseñáu pa esti domingu ye'l siguiente: A les 11:00 emprincipiará la tirada oficial conos equipos del CNL, y darréu d'ello a les 13:00 dará entamu el I Abiertu "El Llano" puntuable pal Campionatu Individual, y dende esa mesma hora tolos participantes podrán degustar dellos productos isotónicos (bollos preñaos, empanada, bollines, sidra) na Espicha Isotónica, cortesía d'Espor d'Asturies.

Esperámosvos a toes/os pa festexar l'entamu d'esti II Campionatu d'Asturies de Liriu.

Liriu lariu nel tendayu.

Más de mediu centenar de persones s’allegaron al tendayu del Muséu del Pueblu d’Asturies de Xixón el mediudía del domingu 29 payares, p’alcontrase col equipu d’Espor[a] y cellebrar con ellos el títulu del Campionatu d’Asturies de Liriu, organizáu pol CNL. Familiares, amigos y curiosos, ente los que s’alcontraben los collacios de los equipos Sidrones y Quirinal Liriu Espor, amás de Xermán Viluba, de l’asociación “O Varal” impulsora de la LNB, y Hevia, organizador de la última Copa Cantábrica.

Equipu d'Espor[a]. Arriba, César, Iyán, Mara y
Carlos; embaxo, Xuacu, Pepa, Lucía y Sergio.

El sol, que salió pa caldiar el sitiu, fizo asomar el sudu nes frentes de la xente que s’averaba a coyer un liriu y una machorra pa probar per primer vez, colos conseyos de los xugadores del equipu. Un culín de sidra, un trocín de tortiella y otru d’empanada y una bollina dulce y yá taben toos preparaos pa disputase'l I Open Bollu Preñáu de Xixón.

Les fueyes del suelu nun impidieron que’l nuesu compañeru Iyán algamara’l so segundu encastráu, nin que Xermán (Quirinal) ganara’l bollu preñáu de premiu na final ante Carlos Suari (Espor[a]), nun Open con más de venti participantes.

Xermán recibe'l bollu del xixonés Sergio.

La rifa de la empanada y los preseos del xuegu, dio pasu a la despedida del alcuentru, bien pasaes les 2 de la tarde. Ensin embargu, l’equipu quedó disfrutando del espaciu xugando al liriu, pa preparar una sorpresa que tará llista bien ceo.

Yá tenemos ganes de ponemos a trabayar nel segundu Capionatu d’Asturies de Liriu y sofitar esti xuegu asturianu que tanto nos presta.

¡Alcuentru de liriu! ¡Lariu!

Dempués de llevar los xuegos tradicionales a Noreña fai dos selmanes, Espor[a] vuelve a la carga esta fin de selmana en Xixón.

El domingu, a les 12 de la mañana, va cellebrase el I Alcuentru Xixón de Liriu, nel tendayu del Muséu del Pueblu d’Asturies, pa averar esti xuegu d’una vez por toes a la villa xixonesa.

Habrá un taller pa deprender el usu del liriu y la machorra a la xente que s’afaye, amás de les normes CNL, una muestra d’otres varientes del liru n’Asturies y, pa rematar, un abiertu, l’Open “Bollu Preñáu”. Ensin olvidar la espicha isotónica, tan hermanda col liriu siempre.

Destamiente, dende Espor d’Asturies queremos cellebrar el Campionatu d’Asturies de Liriu recientemente consiguíu en Piarnu con tola xente que quiera acompañanos nun sitiu tan prestosu como ye’l muséu del nuestru pueblu.

¡VÉMONOS EL DOMINGU!

Amagüestu en Noreña

Esti sabadu 14 de payares, n'antigua Plaza d'Abastos de Noreña, Espor d'Asturies participará del amagüestu entamáu pola Escuela de Música y Danza Tradicional de Noreña.

A lo primero, dende les 19:30 hores, les/os neñes/os han de convencer a los sos pas p'averase al Condáu de Noreña, y asina poder esfrutar de dellos xuegos tradicionales.


A les 20:30, tendrá llugar la partida de liriu "Espor[a] (Campiones d'Asturies) Vs Resto'l mundiu", agora ye'l turnu pa que les/os más mayorones/os entren en xuegu tratando de ganar al equipu uvieín, ganador del I Campionatu Asturianu de Liriu.

Pa finar, a les 21 :30, xugaráse'l I Abiertu de Liriu de Noreña, con inscripción llibre pa toles/os que quieran apuntase.

El xuegu, el baille, la gaita y la tonada, van ser la exa principal pa facer xirar esta tarde onde podrás participar de la cultura tradicional d'esti país.

ESPERAMOSVOS EN NOREÑA

Espor[a] termina l'añu ensin conocer la derrota

Esta fin de selmana Espor[a] remató un añu históricu tanto pal propiu equipu, como pa l'espor y los xuegos tradicionales.

L'equipu uvieín presentábase'l sábadu en Piarnu col Campionatu en bolsu, pero con series duldes por delles baxes d'última hora que fixenon temer pola imbatibilidá d'Espor[a]. La xornada arrincaba cona incomparecencia del equipu local d'Asturliriu, dándo-yos matemáticamente la segunda plaza a Quirinal Liriu Espor. Depués de les primeres carreres, Espor d'Asturies cadecía de les ausencies de les/os compañeres/os, que nun pudienon acudir a la cita y asina los 4 convocaos, Luis Carlos, Sergio, Carlos y Xuacu tuvienon que sudar, pesie al mal tiempu, pa llegar a la última carrera igualaos a 81 puntos. Foi entós cuando Sergio tuvo de mandar del so "liriucentrismu" pa ganar in extremis la última carrera y asina finar esti gloriosu añu ensin conocer la derrota. D'esti mou dábase por concluyíu'l I Campionatu Asturianu de Liriu nel qu'Espor[a] algamó la primer plaza con 12 puntos de 12 posibles.

Pero la cita col liriu continuaba'l domingu cona III Copa Cantábrica de Liriu, esta vez na pista de Piedrasblancas (Castrillón), por motivos meteorolóxicos. D'Espor d'Asturies, Lucía, Luis, Sergio, Carlos y Xuacu sedríen los convocaos pola Selección Asturiana p'aventar los lirios na llucha pola III Copa Cantábrica de Liriu, y nun defraudaron, aportando'l so bon facer machorrador pa qu'Asturies consiguiera derrotar a Galiza por 31 puntos a 25 y alzar l'ansiáu troféu per primer vegada nos sos tres años de lleenda.


Pero depués de ganar la Copa y de la xinta en Casa Orosia (Las Bárzanas), los esporos queríen más, y asina Sergio y Xuacu metíense na semifinal del III Abiertu Llacón Internacionalista, lluego de les dures clasificatories. Xuacu cayía na semifinal contra Marcos (LNB), pero Sergio aprucía na final depués de vencer a Reyes (LNB). Asina, na gran carrera cabera pol llacón taba l'implacable Espor[a] Sergio que s'imponía a Marcos (LNB) y llevaba'l llacón pa Xixón. Rematábase una xornada y una temporada histórica pa Espor d'Asturies y pal Conceyu Nacional de Liriu nesti primer añu de camín.


¡ YÁ NAGUAMOS POL II CAMPIONATU ASTURIANU DE LIRIU !

Espor[a] viaxa a Castrillón con ganes de liriu

Esta fin de selmana Espor[a] tien muncho que dicir nes dos últimes cites esportives del añu. D'un llau el sabadu, 8 de payares, Espor d'Asturies tien na so mano terminar esti I Campionatu d'Asturies de Liriu ensín conocer la derrota; pa ello la escuadra carbayona concentrarase'l mesmu sabadu a partir de les 16:00 hores na pista poliesportiva de Piarnu (Castrillón) onde habrán de midise a los avilesinos de Quirinal Liriu Espor y los llocales d'Asturliriu.

Mentanto'l domingu, 9 de payares, na mesma pista de Piarnu (si mos dexa'l tiempu) dende les 11:00 les/os seleccionaes/os d'Espor[a] tratarán d'aportar lo meyor de si, a la Selección Asturiana de Liriu que va competir por esta III Copa Cantabrica de Liriu, frente a la Autentica Selección Galega.

Asina esti fin de selmana les espores del liriu xorrecerán en Castrillón.

Teletipu: Espor[a] sentencia y L.luis Riaño gana la llonganiza

Con un inéditu ya históricu "encastráu" (facer castru nún únicu golpéu), Iyán González, machorra privilexada de les files carbayones, sentenció la segunda xornada del Campionatu Nacional de Liriu, onde Espor[a] pudo de nueves pa la, esta vegada, escuadra organizadora, Quirinal Liriu Espor. Con esti trunfu (2 de 2), la competición ta sentenciada y cola sola comparecencia d'Espor[a] na cita cabera, el gallardón d'esti primer Campionatu descansará n'Uviéu. Con too, quedará emoción abonda pa la tercer xornada, centrada en saber pa quién ye la segunda plaza. D'otra banda, la participación d'Espor[a] na concentración de machorres ayeri en La Madalena (Avilés), redondióse cola victoria autoritaria del uvieo-somedán L.luis Riaño nel I Abiertu Llonganiza.

Liriu N'ASTURIANU!!

Espor[a] tuvo presente nos cursos de branu que l'Academia de la Llingua Asturiana entama tolos años en Santantolín, capital del conceyu d'Ibias. Dientro de los Cursos d'Afondamientu Cultural y Llingüisticu, Espor[a] participó del cursu "Otros xuegos y tradiciones populares na enseñanza", empobináu pol antropólogu y profesor de la Universidá d'Uviéu, Roberto González-Quevedo.

Pela mañana Carlos Suari, dió un repasu al procesu d'institucionalización de los xuegos asturianos, inventariando el corpus teóricu, y analizando los últimos casos d'esti fenómenu, como el del Liriu, cola creación recién del Conceyu Nacional de Liriu.

Depués de la xinta, llegó la hora de la práctica, amosando al alumnáu delles de les munches posibilidaes qu'ofrez esti xuegu, como son el Liriu CNL y el Liriu cooperación-oposición.

Con esta xornada Espor d'Asturies afitó'l so compromisu, amás de colos xuegos y deportes tradicionales, cola cultura y les llingues del país.

Espor[a] collabora con Fai! na Fiesta de les Asocaciones de Xixón

Espor[a] acudió al llamáu de Fai! pa participar conxuntamente na Fiesta de les Asociaciones entamada pol Conseyu de la Mocedá de Xixón, que tuvo dedicada a la difusión y tresmisión de vezos y costumes indíxenes.

Fai! y Espor[a] quiximos facer un apueste pola anovación, espardimientu y modernización de los xuegos tradicionales del país como una parte más del nuesu patrimoniu coleutivu hestóricu que nun ha quedar nel escaezu.

Poro, aprovechamos p'agradecer a Fai! el convite, deseando lo meyor a esta organización que trabaya pa torgar la estroza ambiental del nuestru paisaxe, el recorte de llibertaes y derechos individuales y coleutivos y el xenocidiu cultural y llingüísticu que carecemos a diariu como asturianes y asturianos.

Espor[a] guisa, Espor[a] cueme

L'españíu de les machorres atapó'l soníu de les avionetes na mañana d'ayeri en Llamorgal. Asturliriu, Quirinal y Espor[a], aportaben a la primer xornada del Campionatu d'Asturies de Liriu cola enerxía concentrao de munchos meses de preparación. Cola organización del Conceyu Nacional de Liriu y con Espor[a] como anfitrión entamaba un camín nuevu pa esti vieyísimu xuegu asturianu, agora espor.

Tres les trenta carreres de la tirada oficial, Espor[a] resultaba vencedor con 73 puntos, siguío por Quirinal con 65 y en tercer llugar por Asturliriu que llograba 51. Trés representantes d'Espor[a] foron los machorradores estadísticamente más valiosos de la mañana: Sergio Buelga que llogró materializar el 94% de los puntos que disputó, Xuacu Rodríguez que facía un 89% y Carlos Suari con un 83%.


Depués de la espicha isotónica y de xermandía y yá nun ambiente entá más lúdicu, los Espor[a] Iyán González y Xuacu Rodríguez tuvieron nel primer y segundu puestu del Abiertu Barreñón, acompañaos por Luisa (d'Avilés), inesperada finalista que sorprendió nel dominiu de la machorra nesti tornéu disputáu a eliminatories directes.


Cola entrega de premios cortesía de l'Academia de la Llingua Asturiana y la correspondiente semeya de familia, pesllóse una xornada histórica pal espor tradicional asturianu.

El Liriu encastra con Pierre Parlebas

Últimes noticies dende l'hotel Julia, el búnquer asturianu na Ribera del Duero.

Na xornada de güei el CNL representáu equí pola delegación d'Espor[a], escribió una de les primeres páxines doraes de la so historia. Pierre Parlebas, sociólogu, matemáticu, llingüista, psicólogu, profesor eméritu de la Sorbona y fundador de la praxeoloxía motora (ciencia central de l'actividá física) esllumó güei na cancha central del C.D. Michelín d'Aranda de Duero. En breve, Espor[a] ampliará, pa tolos sos siguidores, la información sobre'l profesor francés y dará testimoniu gráficu del manexu de la machorra del qu'anguaño ye consideráu padre de la motricidá moderna, mesmo que Newton inaugurara la Física de güei.

L'Espor d'Asturies toma Castiella

Espor[a] va participar nel "Encuentro Internacional de Juegos Tradicionales" que tendrá llugar los proximos díes 9, 10, 11 y 12 de xunetu n'Aranda de Duero (Burgos). Xunto Espor[a], la Asociación del Bolu Vaqueiru, y la Peña Bolística Reculta van tar representando la cultura fisica del país delante de les más de 700 persones que participarán d'estes xornaes d'estudiu de la etnoludomotricidá, y nes que l'espor d'Asturies nun podía quedar fuera.

La espedición Espor[a] llevará'l xuegu del Liriu y les novedaes CNL a esti alcuentru internacional, nel que tamién trataremos de transmitir la fuerza y la filosofía Billardeira del país vecín y de los collacios de la LNB.

Na mañana del vienres la "Association Européenne des Jeux et Sports Traditionnels" cellebrará la so "IX Asamblea Xeneral", na que Espor[a] tamién tará presente p'asina entamar los trámites necesarios pa formar parte de la "AEJST".

Pero amás el sabadu a les 16:00 nel Congresu Mundial “Juegos Tradicionales y Salud Social Global” ún de "les espores" Carlos Suari, presentará la so comunicación "EL XUEGU TRADICIONAL ASTURIANU NA E.S.O.: PRONÓSTICU RESERVÁU" dientro de les xornaes técniques "Juego Tradicional en el Ambito de la Enseñanza".

Y si depués d'esto hai ganes de más espor tradicional (que les habrá), nun olvidéis que'l día 18 de xunetu ye la primer xornada'l Campionatu Nacional de Liriu.

Xuegos xugaos en Noreña

El día de San Xuan, Espor[a] llevó los Xuegos Tradicionales a Noreña. Na Foguera entamada pola A. F. M. "Villa y Condáu de Noreña", delles espores xerminaron averando la actividá física tradicional a nuevos y vieyos.



Esti martes nel práu la foguera alredor de 80 neñes y neños de toles edaes tuvieron la posibilidá de participar del espor tradicional y esfrutar con cerca d'una docenina xuegos de lo más variao, amosando asina la bayurosa cultura física d'esti país.

• Dexabolu
• Pasabolu
• Tiru al palu
• Llanzamientu de Barra Asturiana
• Liriu (CNL)
• Liriu por equipos
• Carrera de Panoyes
• Carrera de Llecheres
• Cuatro Esquines
• Pañuelu
• y otros xuegos de siempre.

Dende Espor[a] queremos agradece-y a la A. F. M. "Villa y Condáu de Noreña" esti apueste decidíu pola dignificación y l'espoxigue de los XUEGOS Tradicionales xugaos y non d'escaparate. y pol so compromisu pa cola cultura d'Asturies. Asinamesmo, Espor d'Asturies queda a la so disposición pa tomar otra vuelta les cais del Condáu de Noreña.

Espor[a] vuelve amosar el so caracter polifacéticu participando nos díes 9, 10, 11 y 12 del mes de Xunetu, nel "Encuentro Internacional de Juegos Tradicionales" que se cellebrará n'Aranda de Duero (Burgos). L'Espor d'Asturies va conquistar Castiella a güelpe de liriu y machorra.

Espor[a] algama un tercer y un quintu puestu nel I Tornéu "Pitu Caleya"

Esti domingu 21 de xunu en Piarnu, como ye vezu, vivióse otra xornada más de folixa y reivindicación del xuegu tradicional col liriu como protagonista, primero na "procesión", col I Tornéu "Pitu Caleya", y depués na "romería" col Open "Pitu de competición".

Darréu del sortéu de grupos realizáu polos los xueces del CNL, Espor[a], arrincaba la so andadura nel I Tornéu "Pitu Caleya". Nuna primer ronda nel grupu formáu por Sergio (Espor[a]), Xermán (O Varal) y Carlos (Espor[a]) seríen estos dos últimos los que pasaren a la semifinal. Mentanto n'otru grupu Xuacu (Espor[a]) había medise con Daniel (Billardeiros Musicais) y col seleccionador nacional Pravia (Quirinal Liriuespor) al que'l cambéu nel reglamentu y tarrén de xuegu dexaríalu fuera de la semifinal.

Dos representantes d'Espor[a] taben en semifinales onde yá naide bromiaba, col son de la gaita de fondu, Carlos (Espor[a]) yera'l primeru en clasificase pa la gran final, depués sedría Daniel (Billardeiros Musicais) y, nuna dura semifinal, Eric (Billardeiros Musicais) y Xuacu (Espor[a]) llegaben a la fin con un empate técnicu, pa que yá, na carrera de desempate, fora Eric el terceru n'entrar na gran final del I Tornéu "Pitu Caleya".

Emprincipiaba la final col son de la tonada, Daniel amosó dende'l primer güelpe la so intención de ganar esti tornéu y Eric nun quería quedar atrás, asina entamaron a ponese prietes les coses pa Carlos, viendo como'l pitu caleya entamaba a cruciar la ría l'Eo. Depués de 3 carreres Daniel (Billardeiros Musicais) proclamóse xustu vencedor d'esti I Tornéu "Pitu Caleya", quedando Carlos nuna meritoria tercer plaza, asitiando a Espor[a] no mas alto l'espor del paliyu y la machorra.

Yera la hora la xinta y Casa Orosia (Las Bárzanas) aguardaba la llegada'l famientu cortexu'l CNL. Fabes, berces, arroz asturiano, carne asao, adobu, rollu bonitu, tarta xelada, tarta d'almendra, natilles, gaita y dellos chupitos, calecieron les ansies de revancha. Asina, col banduyu bien llen treslladábemos otra vez machorres y lirios pa la pista selvática de Piarnu, a la gueta d'una victoria asturiana, depués de calecer con otres formes tradicionales de xugar col liriu y la machorra.

Pa complicalo un poco más el Conceyu Nacional de Liriu decidió mudar el castru pa onde l'herba taba más alto y asina col calor, la dixestión y l'altor del verde, pone-y difíciles les coses a los collacios de la LNB. Entamaba a la mesma hora que la romería, l'Open "Pitu de Competición" nel qu'otros 15 participantes lluchaben por una plaza na final. Quiciabes la fartura, quiciabes la mano técnica de los asturianos... el podium acabó siendo nacional y d'Espor[a], y sólo'l gran Xermán pudo metese cuartu como representante gallegu, mentanto que los tres Billardeiros Musicais que brillaren durante la mañana, viéronse na metá baxa de la clasificación.

Tolo contrario que los Espor[a] Xuacu, Sergio y Carlos, que tuvieron na metá alta, consiguiendo amás el trunfu verspertín dende la machorra-micrófonu del director y locutor d'Acuto que yá fixera bronce pela mañana. Xuacu caltuvo la regularidá col so séptimu puestu -fuera quintu pela mañana- y Sergio facía una estrena de luxu con un honoríficu quintu puestu na verbena de Piarnu. El liriu astur garra rumbu nuevu y apuesta fuerte dende la mocedá de los recién llegaos. El Conceyu Nacional de Liriu yá caleya solu -y non en círculu- y bien ceo vais conocer el Campionatu que ta en camín. La independencia aportó al espor del paliyu y la machorra.

Amás esti martes 23 en Noreña, Espor d'Asturies participará de la foguera de San Xuan, acercando'l xuegu tradicional a nuevos y vieyos. Espor[a] tará dende les 19'30 xugando al Pasabolu, Liriu (CNL), Carrera de Panoyes, Tiru al palu, Llanzamientu de Barra Asturiana, Carrera de Llecheres, Dexabolu, Liriu y otros xuegos de siempre.