Xuegos xugaos en Noreña

El día de San Xuan, Espor[a] llevó los Xuegos Tradicionales a Noreña. Na Foguera entamada pola A. F. M. "Villa y Condáu de Noreña", delles espores xerminaron averando la actividá física tradicional a nuevos y vieyos.



Esti martes nel práu la foguera alredor de 80 neñes y neños de toles edaes tuvieron la posibilidá de participar del espor tradicional y esfrutar con cerca d'una docenina xuegos de lo más variao, amosando asina la bayurosa cultura física d'esti país.

• Dexabolu
• Pasabolu
• Tiru al palu
• Llanzamientu de Barra Asturiana
• Liriu (CNL)
• Liriu por equipos
• Carrera de Panoyes
• Carrera de Llecheres
• Cuatro Esquines
• Pañuelu
• y otros xuegos de siempre.

Dende Espor[a] queremos agradece-y a la A. F. M. "Villa y Condáu de Noreña" esti apueste decidíu pola dignificación y l'espoxigue de los XUEGOS Tradicionales xugaos y non d'escaparate. y pol so compromisu pa cola cultura d'Asturies. Asinamesmo, Espor d'Asturies queda a la so disposición pa tomar otra vuelta les cais del Condáu de Noreña.

Espor[a] vuelve amosar el so caracter polifacéticu participando nos díes 9, 10, 11 y 12 del mes de Xunetu, nel "Encuentro Internacional de Juegos Tradicionales" que se cellebrará n'Aranda de Duero (Burgos). L'Espor d'Asturies va conquistar Castiella a güelpe de liriu y machorra.

Espor[a] algama un tercer y un quintu puestu nel I Tornéu "Pitu Caleya"

Esti domingu 21 de xunu en Piarnu, como ye vezu, vivióse otra xornada más de folixa y reivindicación del xuegu tradicional col liriu como protagonista, primero na "procesión", col I Tornéu "Pitu Caleya", y depués na "romería" col Open "Pitu de competición".

Darréu del sortéu de grupos realizáu polos los xueces del CNL, Espor[a], arrincaba la so andadura nel I Tornéu "Pitu Caleya". Nuna primer ronda nel grupu formáu por Sergio (Espor[a]), Xermán (O Varal) y Carlos (Espor[a]) seríen estos dos últimos los que pasaren a la semifinal. Mentanto n'otru grupu Xuacu (Espor[a]) había medise con Daniel (Billardeiros Musicais) y col seleccionador nacional Pravia (Quirinal Liriuespor) al que'l cambéu nel reglamentu y tarrén de xuegu dexaríalu fuera de la semifinal.

Dos representantes d'Espor[a] taben en semifinales onde yá naide bromiaba, col son de la gaita de fondu, Carlos (Espor[a]) yera'l primeru en clasificase pa la gran final, depués sedría Daniel (Billardeiros Musicais) y, nuna dura semifinal, Eric (Billardeiros Musicais) y Xuacu (Espor[a]) llegaben a la fin con un empate técnicu, pa que yá, na carrera de desempate, fora Eric el terceru n'entrar na gran final del I Tornéu "Pitu Caleya".

Emprincipiaba la final col son de la tonada, Daniel amosó dende'l primer güelpe la so intención de ganar esti tornéu y Eric nun quería quedar atrás, asina entamaron a ponese prietes les coses pa Carlos, viendo como'l pitu caleya entamaba a cruciar la ría l'Eo. Depués de 3 carreres Daniel (Billardeiros Musicais) proclamóse xustu vencedor d'esti I Tornéu "Pitu Caleya", quedando Carlos nuna meritoria tercer plaza, asitiando a Espor[a] no mas alto l'espor del paliyu y la machorra.

Yera la hora la xinta y Casa Orosia (Las Bárzanas) aguardaba la llegada'l famientu cortexu'l CNL. Fabes, berces, arroz asturiano, carne asao, adobu, rollu bonitu, tarta xelada, tarta d'almendra, natilles, gaita y dellos chupitos, calecieron les ansies de revancha. Asina, col banduyu bien llen treslladábemos otra vez machorres y lirios pa la pista selvática de Piarnu, a la gueta d'una victoria asturiana, depués de calecer con otres formes tradicionales de xugar col liriu y la machorra.

Pa complicalo un poco más el Conceyu Nacional de Liriu decidió mudar el castru pa onde l'herba taba más alto y asina col calor, la dixestión y l'altor del verde, pone-y difíciles les coses a los collacios de la LNB. Entamaba a la mesma hora que la romería, l'Open "Pitu de Competición" nel qu'otros 15 participantes lluchaben por una plaza na final. Quiciabes la fartura, quiciabes la mano técnica de los asturianos... el podium acabó siendo nacional y d'Espor[a], y sólo'l gran Xermán pudo metese cuartu como representante gallegu, mentanto que los tres Billardeiros Musicais que brillaren durante la mañana, viéronse na metá baxa de la clasificación.

Tolo contrario que los Espor[a] Xuacu, Sergio y Carlos, que tuvieron na metá alta, consiguiendo amás el trunfu verspertín dende la machorra-micrófonu del director y locutor d'Acuto que yá fixera bronce pela mañana. Xuacu caltuvo la regularidá col so séptimu puestu -fuera quintu pela mañana- y Sergio facía una estrena de luxu con un honoríficu quintu puestu na verbena de Piarnu. El liriu astur garra rumbu nuevu y apuesta fuerte dende la mocedá de los recién llegaos. El Conceyu Nacional de Liriu yá caleya solu -y non en círculu- y bien ceo vais conocer el Campionatu que ta en camín. La independencia aportó al espor del paliyu y la machorra.

Amás esti martes 23 en Noreña, Espor d'Asturies participará de la foguera de San Xuan, acercando'l xuegu tradicional a nuevos y vieyos. Espor[a] tará dende les 19'30 xugando al Pasabolu, Liriu (CNL), Carrera de Panoyes, Tiru al palu, Llanzamientu de Barra Asturiana, Carrera de Llecheres, Dexabolu, Liriu y otros xuegos de siempre.

I Tornéu "Pitu de caleya"

Depues del ésitu collecháu pola Selección Asturiana de Liriu en tierres gallegues, onde foron convocaos dellos miembros d'espor[a], continua la pretemporada con esti I Tornéu "Pitu de caleya" entamáu pol CNL y que va ser la última oportunidá pa medinos cona xente d'Asturliriu y Kirinal Liriu Espor, primero de qu'arrinque'l I Campionatu Nacional de Liriu, del que tendremos les feches confirmaes la selmana viniente.

Esti domingu 21 de xunu dende les 11'30 la mañana na pista central de Piarnu (Castrillón) tará en xuegu el I Tornéu "Pitu de Caleya", onde vamos tar lluchando por esi pitín como tola xente que quiera arimase hasta Piarnu, ya qu'esti tornéu va xugase de forma abierta. El domingu va convertise nuna xornada histórica de folixa y reivindicación de los xuegos y l'espor del país na qu'esperamos que vos animéis y atendáis la llamada del CNL.

ESTI DOMINGU 21 TOOS A COMPETIR POL I TORNÉU NACIONAL "PITU DE CALEYA"

Asturies ruempe les machorres na llucha pol "Año Preto"

La Selección Asturiana de Liriu, formada por Pravia, Toño, Urbano, Luis, Carlos y Xuacu, ta acabante de llegar de Celeiro de Mariñaos, onde compitieron nel IV Tornéu Parroquial "Año Preto". El Combináu Nacional, que na llucha pol triunfu terminó rompiendo les machorres, quedó nun meritoriu cuartu puestu tan solo vencida pol gran equipu de Vilamar, ganador del tornéu.

Asturies acompañada pol orbayu gallegu entamó la so competición nuna primer partida escontra'l gran equipu de Vilamar que dominó dende la primer carrera. Na metada l'alcuentru l'esfuerzu fechu polos nuesos xugadores ganando delles carreres nun foi suficiente pa baltiar la diferencia algamada por Vilamar, que muncho más concentraos superaron al conxuntu asturianu, algamando la segunda victoria pa Vilamar, que yá ganara a Xove primero, dexando a Vilamar clasificáu pa la final.

Depues del descansu y les felicitaciones a los clasificaos, yera la hora del encuentru ente Xove y Asturies, nel que se definiríen les places de la cuarta a la duodécima. Dende les primeres carreres entamó a calecese l'ambiente calteniéndose cásique de contino un empate ente los dos equipos. A falta de 5 carreres Asturies ganaba por 3 al equipu de Xove. Nesti momentu los nuesos dalgo nerviosos fallaron nes tiraes finales, pero dexó d'orbayar na pista central de Celeiro y apareció'l seleccionador nacional, Pravia que con dellos machorrazos maestros dió un emburrión al equipu consiguiendo la victoria y la cuarta plaza na clasificación final, faciendo asina rescamplar el potencial de la nuesa selección, asitiándose como firme candidata a la Copa Cantabrico de Liriu.

Darréu del espectaculu esportivu yera la hora de la sesión vermú onde se presentaría el poemariu "Orbayu d'alfileres" de Carlos Suari y el tema Circu de Zimmer103, inspiráu nel poema de mesmo títulu. Y depués d'esti momentu artísticu-reivindicativu, llegó la "Guagua (Tropical) da LNB" que nos llevaría a Reinante pa la esperada xinta de xermandía con productos del país vecín y la "Callada coma resposta.....".

Na tarde de Celeiro apaeció'l sol faciendo que secara la pista pa qu'entamara la final a 3 d'esti IV Tornéu Parroquial "Año Preto". Asina emprincipió l'esperáu momentu, nel que los equipos de Furabolos, Vilamar y Billardeiros Musicais, compitieron pol "Año Preto", que depues de munches carreres nes que l'empate foi la tónica xeneral, el nuevu conxuntu de Vilamar algamo la victoria faciendose asina col codiciáu reciellu, esti añu blancu.

Pero esti tornéu nun termina equí, como ye tradición nes selmanes vinientes tendra de xugase'l tercer tiempu, folixa-xinta pa degustar el "Año Preto", nel chigre de Lola de Remourelle.

Amás l'espor tradicional va tener continuidá nel nuesu país esta mesma selmana. El domingu 21 de xunu en Piarnu (Castrillón) va xugase el I Tornéu "Pitu de Caleya", entamáu pol CNL (Conceyu Nacional de Liriu), que sirvirá de sofitu pa echar a andar l'ansiáu Campionatu del que vais tar informaos equí mesmo.

A pol "Año Preto"

Esti domingu 14 de xunu dellos miembros d'espor[a] convocaos pola Selección Asturiana de Liriu van participar nel IV Tornéu Parroquial "Año Preto" en Celeiro de Mariñaos (Ribadeo) convidaos pola LNB.

El Combináu Nacional formáu por Pravia, Toño, Urbano, Luis, Carlos y Xuacu va tar lluchando dende primer hora de la mañana por traer el "andoscu prietu" p'Asturies. A les 11:00 hores tendrá que medise al temible equipu de Vilamar, que cuenta con dellos de los estandartes de la selección gallega nes sos files. Y a les 12:00 tocará competir con Xove que de xuru nun van poner nada fáciles les coses pa los nuesos, que llucharán pa clasificase a la gran final que se xugará a les 16:30 na pista central de Celeiro.

espor[a] tará al llau de la nuesa selección que capitaneada por Pravia nun va renunciar a nada y lluchará por esti tornéu, que tamién tien traces de preparatoriu pa la Copa Cantábrico que se celebrará a finales de branu.

Amás de lo puramente esportivo, a les 13:00 na cantina de Celeiro podremos disfrutar d'una sesión vermú onde se presentará el poemariu "Orbayu d'alfileres" de Carlos Suari y el tema Circu de Zimmer103, inspiráu nel poema del mesmu títulu. Y depués d'esti momentu artísticu-reivindicativu, llegará la esperada xinta de xermandía con productos del país vecín.

Asina qu'esperamos la respuesta d'una marea azul qu`acuda a Celeiro de Mariñaos pa sofitar a Asturies nesti IV Tornéu Parroquial "Año Preto".