Espor[a] guisa, Espor[a] cueme

L'españíu de les machorres atapó'l soníu de les avionetes na mañana d'ayeri en Llamorgal. Asturliriu, Quirinal y Espor[a], aportaben a la primer xornada del Campionatu d'Asturies de Liriu cola enerxía concentrao de munchos meses de preparación. Cola organización del Conceyu Nacional de Liriu y con Espor[a] como anfitrión entamaba un camín nuevu pa esti vieyísimu xuegu asturianu, agora espor.

Tres les trenta carreres de la tirada oficial, Espor[a] resultaba vencedor con 73 puntos, siguío por Quirinal con 65 y en tercer llugar por Asturliriu que llograba 51. Trés representantes d'Espor[a] foron los machorradores estadísticamente más valiosos de la mañana: Sergio Buelga que llogró materializar el 94% de los puntos que disputó, Xuacu Rodríguez que facía un 89% y Carlos Suari con un 83%.


Depués de la espicha isotónica y de xermandía y yá nun ambiente entá más lúdicu, los Espor[a] Iyán González y Xuacu Rodríguez tuvieron nel primer y segundu puestu del Abiertu Barreñón, acompañaos por Luisa (d'Avilés), inesperada finalista que sorprendió nel dominiu de la machorra nesti tornéu disputáu a eliminatories directes.


Cola entrega de premios cortesía de l'Academia de la Llingua Asturiana y la correspondiente semeya de familia, pesllóse una xornada histórica pal espor tradicional asturianu.

El Liriu encastra con Pierre Parlebas

Últimes noticies dende l'hotel Julia, el búnquer asturianu na Ribera del Duero.

Na xornada de güei el CNL representáu equí pola delegación d'Espor[a], escribió una de les primeres páxines doraes de la so historia. Pierre Parlebas, sociólogu, matemáticu, llingüista, psicólogu, profesor eméritu de la Sorbona y fundador de la praxeoloxía motora (ciencia central de l'actividá física) esllumó güei na cancha central del C.D. Michelín d'Aranda de Duero. En breve, Espor[a] ampliará, pa tolos sos siguidores, la información sobre'l profesor francés y dará testimoniu gráficu del manexu de la machorra del qu'anguaño ye consideráu padre de la motricidá moderna, mesmo que Newton inaugurara la Física de güei.

L'Espor d'Asturies toma Castiella

Espor[a] va participar nel "Encuentro Internacional de Juegos Tradicionales" que tendrá llugar los proximos díes 9, 10, 11 y 12 de xunetu n'Aranda de Duero (Burgos). Xunto Espor[a], la Asociación del Bolu Vaqueiru, y la Peña Bolística Reculta van tar representando la cultura fisica del país delante de les más de 700 persones que participarán d'estes xornaes d'estudiu de la etnoludomotricidá, y nes que l'espor d'Asturies nun podía quedar fuera.

La espedición Espor[a] llevará'l xuegu del Liriu y les novedaes CNL a esti alcuentru internacional, nel que tamién trataremos de transmitir la fuerza y la filosofía Billardeira del país vecín y de los collacios de la LNB.

Na mañana del vienres la "Association Européenne des Jeux et Sports Traditionnels" cellebrará la so "IX Asamblea Xeneral", na que Espor[a] tamién tará presente p'asina entamar los trámites necesarios pa formar parte de la "AEJST".

Pero amás el sabadu a les 16:00 nel Congresu Mundial “Juegos Tradicionales y Salud Social Global” ún de "les espores" Carlos Suari, presentará la so comunicación "EL XUEGU TRADICIONAL ASTURIANU NA E.S.O.: PRONÓSTICU RESERVÁU" dientro de les xornaes técniques "Juego Tradicional en el Ambito de la Enseñanza".

Y si depués d'esto hai ganes de más espor tradicional (que les habrá), nun olvidéis que'l día 18 de xunetu ye la primer xornada'l Campionatu Nacional de Liriu.

Xuegos xugaos en Noreña

El día de San Xuan, Espor[a] llevó los Xuegos Tradicionales a Noreña. Na Foguera entamada pola A. F. M. "Villa y Condáu de Noreña", delles espores xerminaron averando la actividá física tradicional a nuevos y vieyos.



Esti martes nel práu la foguera alredor de 80 neñes y neños de toles edaes tuvieron la posibilidá de participar del espor tradicional y esfrutar con cerca d'una docenina xuegos de lo más variao, amosando asina la bayurosa cultura física d'esti país.

• Dexabolu
• Pasabolu
• Tiru al palu
• Llanzamientu de Barra Asturiana
• Liriu (CNL)
• Liriu por equipos
• Carrera de Panoyes
• Carrera de Llecheres
• Cuatro Esquines
• Pañuelu
• y otros xuegos de siempre.

Dende Espor[a] queremos agradece-y a la A. F. M. "Villa y Condáu de Noreña" esti apueste decidíu pola dignificación y l'espoxigue de los XUEGOS Tradicionales xugaos y non d'escaparate. y pol so compromisu pa cola cultura d'Asturies. Asinamesmo, Espor d'Asturies queda a la so disposición pa tomar otra vuelta les cais del Condáu de Noreña.

Espor[a] vuelve amosar el so caracter polifacéticu participando nos díes 9, 10, 11 y 12 del mes de Xunetu, nel "Encuentro Internacional de Juegos Tradicionales" que se cellebrará n'Aranda de Duero (Burgos). L'Espor d'Asturies va conquistar Castiella a güelpe de liriu y machorra.

Espor[a] algama un tercer y un quintu puestu nel I Tornéu "Pitu Caleya"

Esti domingu 21 de xunu en Piarnu, como ye vezu, vivióse otra xornada más de folixa y reivindicación del xuegu tradicional col liriu como protagonista, primero na "procesión", col I Tornéu "Pitu Caleya", y depués na "romería" col Open "Pitu de competición".

Darréu del sortéu de grupos realizáu polos los xueces del CNL, Espor[a], arrincaba la so andadura nel I Tornéu "Pitu Caleya". Nuna primer ronda nel grupu formáu por Sergio (Espor[a]), Xermán (O Varal) y Carlos (Espor[a]) seríen estos dos últimos los que pasaren a la semifinal. Mentanto n'otru grupu Xuacu (Espor[a]) había medise con Daniel (Billardeiros Musicais) y col seleccionador nacional Pravia (Quirinal Liriuespor) al que'l cambéu nel reglamentu y tarrén de xuegu dexaríalu fuera de la semifinal.

Dos representantes d'Espor[a] taben en semifinales onde yá naide bromiaba, col son de la gaita de fondu, Carlos (Espor[a]) yera'l primeru en clasificase pa la gran final, depués sedría Daniel (Billardeiros Musicais) y, nuna dura semifinal, Eric (Billardeiros Musicais) y Xuacu (Espor[a]) llegaben a la fin con un empate técnicu, pa que yá, na carrera de desempate, fora Eric el terceru n'entrar na gran final del I Tornéu "Pitu Caleya".

Emprincipiaba la final col son de la tonada, Daniel amosó dende'l primer güelpe la so intención de ganar esti tornéu y Eric nun quería quedar atrás, asina entamaron a ponese prietes les coses pa Carlos, viendo como'l pitu caleya entamaba a cruciar la ría l'Eo. Depués de 3 carreres Daniel (Billardeiros Musicais) proclamóse xustu vencedor d'esti I Tornéu "Pitu Caleya", quedando Carlos nuna meritoria tercer plaza, asitiando a Espor[a] no mas alto l'espor del paliyu y la machorra.

Yera la hora la xinta y Casa Orosia (Las Bárzanas) aguardaba la llegada'l famientu cortexu'l CNL. Fabes, berces, arroz asturiano, carne asao, adobu, rollu bonitu, tarta xelada, tarta d'almendra, natilles, gaita y dellos chupitos, calecieron les ansies de revancha. Asina, col banduyu bien llen treslladábemos otra vez machorres y lirios pa la pista selvática de Piarnu, a la gueta d'una victoria asturiana, depués de calecer con otres formes tradicionales de xugar col liriu y la machorra.

Pa complicalo un poco más el Conceyu Nacional de Liriu decidió mudar el castru pa onde l'herba taba más alto y asina col calor, la dixestión y l'altor del verde, pone-y difíciles les coses a los collacios de la LNB. Entamaba a la mesma hora que la romería, l'Open "Pitu de Competición" nel qu'otros 15 participantes lluchaben por una plaza na final. Quiciabes la fartura, quiciabes la mano técnica de los asturianos... el podium acabó siendo nacional y d'Espor[a], y sólo'l gran Xermán pudo metese cuartu como representante gallegu, mentanto que los tres Billardeiros Musicais que brillaren durante la mañana, viéronse na metá baxa de la clasificación.

Tolo contrario que los Espor[a] Xuacu, Sergio y Carlos, que tuvieron na metá alta, consiguiendo amás el trunfu verspertín dende la machorra-micrófonu del director y locutor d'Acuto que yá fixera bronce pela mañana. Xuacu caltuvo la regularidá col so séptimu puestu -fuera quintu pela mañana- y Sergio facía una estrena de luxu con un honoríficu quintu puestu na verbena de Piarnu. El liriu astur garra rumbu nuevu y apuesta fuerte dende la mocedá de los recién llegaos. El Conceyu Nacional de Liriu yá caleya solu -y non en círculu- y bien ceo vais conocer el Campionatu que ta en camín. La independencia aportó al espor del paliyu y la machorra.

Amás esti martes 23 en Noreña, Espor d'Asturies participará de la foguera de San Xuan, acercando'l xuegu tradicional a nuevos y vieyos. Espor[a] tará dende les 19'30 xugando al Pasabolu, Liriu (CNL), Carrera de Panoyes, Tiru al palu, Llanzamientu de Barra Asturiana, Carrera de Llecheres, Dexabolu, Liriu y otros xuegos de siempre.